هەر لەمنداڵییەوە، باوانمان فێریان كردووین كە جنێو بە كەس
نەدەین، بەتایبەتی ئەوانەی لە خۆمان گەورەترن. خێزان و بنەماڵە و خێڵ لەسەر ئەوە
كۆكن و پێداگیری ئەوە دەكەن كە مرۆڤـ نابێت دەمی پیس بێت.. جنێودان یەكێكە لە
خەسڵەتە ناشیرینەكان، حاڵەتێكە كە مرۆڤ دوچاری دەبێت، لەگەڵ تووڕەبوونی هەر
یەكێكماندا و لە بێدەسەڵاتیماندا بەرامبەر بەو بارودۆخەی كە رەنگە بسەپێت و
ناچارییەك لەگەڵ خۆیدا بیهێنێ، رەنگە هێزێكی لەبن نەهاتوو دروستكەری بێت و
پێچەوانەی ئارەزوومان بێت. كاتێك فەرمانێك كە لە جێبەجێكردنیدا زۆر سەخت بكەوێتەوە
بەسەر ژیانماندا و ئێمەش هیچ دەسەڵاتێكمان نەبێت بێجگە لە جێبەجێكردنی ئەو بێگارییە
بۆیە لە رقدا یان لەژێر زمانەوە، دەست بكەین بە جنێودان بەو كەسەی ئەو بارودۆخە
دژوارەی بۆ دروست كردووین و ئێمەش لە ناچاریدا بۆ بژێوی ژیان ناچار بین كارەكەش
بكەین و جنێویش بدەین.
لە كۆمەڵگای كوردیدا، چونكە كار و
شێوازی ژیانمان زەحمەتە و لەنێو حەشامات و ئاپۆڕەدا هەڵسوڕ و داسوڕ بكەین یان كارێك
بكەین سیستماتیكی و بەرنامە بۆڕێژراو نەبێت، پشێوی كاركردن دیارترین خەسڵەتی بێت،
یان بەڕێوەبەرێكی نەشارەزای چەواشە و خۆبەزلزان دەزگایەك بەرێت بەڕێوە و راوێژ بە
هیچ شارەزا و خاوەن ئەزموونێك نەكات و ئیشوكار بە هەڵە و گەندەڵی ببات بەڕێوە، ئیدی
كارمەندان بێجگە لە جنێودان بەودۆخە ناخۆشە هیچی دیكەیان بۆ نامێنێتەوە. راستە
كۆمەڵگای كوردی سوننەتییە و گرنگی بە ئەتەكێتی مۆرالأ و ئاكاری مرۆڤ دەدات، راستە
بەردەوام سەرزەنشتی كەسانی لادەر و سەرپێچیكاردەكات. بەڵام چەند ساڵێكە ئەم
كۆمەڵگایە بە قۆناغێكی نائارامدا گوزەر دەكات. تاكەكانی لەژێر فشاری دەرونیدا
دەژین، بۆیە ئەگەر لەسەر ئیشوكار بن یا بێكار بن. پیادە یا سواری ئۆتۆمبێل بن.
تووڕە و توندوتیژن لە ژیان و كاركردنیاندا. ئەمەش كاردانەوەی سروشتی واقیعی ژیانە،
بۆ نموونە: كەسێك نییە لە جیهاندا كە تووڕە بێت و فیكە لێدات یان گۆرانی بڵێت یان
نوكتەیەك بگێڕێتەوە. هەر دەبێت بۆڵەیەك یان ناڕەزاییەك بە قسەیەكی ناشیرین و
نەفرەتكردنی هۆكاری ئەو تووڕەبوونە دەرببڕدرێت.
بەڵام
دیاردەی جنێودان لای ئێمە خراپ تەشەنەی كردووە و لە منداڵەوە بیگرە تا بە پیرەكان
دەگات، بە رادەیەكی بەرز لاسایی یەكتر دەكەنەوە و جنێوی پیس گوێبیست دەبین، لە
كاتێكدا و كە پێویست بەو رێژە زۆرەی جنێودان ناكات. لەنێو زۆربەی خێزانی كوردیدا
ژیان دژوارە و، باوك فریای هیچ كام لە تێركردنی پێداویستییە زۆرەكان ناكەوێت،
كارەبا بەپارە دەكڕێت و، ناچار جنێودەدات، تەلەفۆن بۆ كابرای موەلیدە دەكات، وەڵامی
ناداتەوە بۆیە ئەم باوكەی كە رەنگە كۆرپەكەشی نەخۆش بێت یان بەرگەی گەرمای هاوین و
ساردی زستانەكەی ئەم وڵاتە نەگرێت. ئیدی ناچار بە جنێو و نەفرەتكردن لە رەوش و كەسە
گەورەكان، دەروونی كوڵاوی خۆی دابمركێنێتەوە!
شایانی باسە
پەیوەندییە كۆمەڵایەتییەكان، لە دۆخێكی ناسروشتی و ناجۆردایە، رێزو خۆشەویستی كەمتر
بۆتەوەو لە جیاتی رق و ناكۆكی و ئارام نەگرتن و تەحەمول نەكردنی یەكتر جێی گرتۆتەوە
بۆنموونە: كڕیار و فرۆشیار، پیادە و شۆفێر، كارمەند و هاوڵاتی. هاوڵاتی و بەرپرس،
خەڵك و حكومەت، خوێندكار و مامۆستا، خەستە و دكتۆر یان پەرستیار، شۆفێر و پۆلیسی
هاتووچۆ، زیندانی و پۆلیس، نەفەرەكانی نێو پاسی كۆستەر (خۆبەخۆ)، باوك و كوڕ، ژن و
مێرد، دایك و كچ، نوسەر و رەخنەگر، موسڵمانی پەڕگیر و عیلمانییەك، سەرخۆش و هۆشیار،
دوو دراوسێ و.. تاد. ئەمانە لەڕاستیدا زۆرینەی ئەو دوو نەیار و بەرانبەرە پێچەوانەن
كە زۆرینەی كات و شوێنەكاندا، وەكو كەڵەشێر بەرامبەر یەكدی دەوەستنەوە و بە تاك و
بە كۆ، جنێوی ناشرین بە یەكتر دەدەن و رەنگە بەردەوامبوونی جنێوی زۆر پیس كە بگاتە
شەرەف، ئیدی چەك بەكارهێنانی بە دواوە دێت و كوشتن و تاوانی لێ دەكەوێتەوە...
جنێودان دیاردەیەكی كۆمەڵایەتی زۆر دیارە و رۆژانە چەندبارە دەبێتەوە و بۆتە
خوویەكی كۆمەڵایەتی خراپ، بەڵام یەكەمین سەرچاوەو كانیلەیەك كە ئەم دیاردەیەی لێوە
دێتە دەرێ و تێكەڵ بە كۆمەڵگا دەبێتەوە بریتییە لە خێزان.
مالی كوردان
توقيــع العضو شميران كركوكي |
|