سڤیل: دهۆك
ئەنجومەنی روحانی ئێزیدیان
لەكۆبوونەوەیەكی تایبەتدا، بڕیاریدا نەختی هیچ كچێكی ئێزیدی لەكاتی مارەكردندا، لە
75 گرام زێڕ زیاتر نەبێت و بەو بڕیارەش رێژەی زەواج لەناوچەكە بەرز دەبێتەوە و
هۆڵەكانی شایی و هەڵپەڕكێ لەبەیانیانیشدا بەرناكەوێت.
دوای
ئەوەی ئەنجوومەنی رووحانی ئێزیدی لەكۆبوونەوەیەكی تایبەتدا بڕیاریدا كە نەختی هیچ
كچێك لەكاتی مارەكردنیدا لە 75 غرام زێڕ زیاتر نەبێت، رێژەی زەواجی لەناوچەكە
بەرزكردەوە و لەمانگی رابردوو تەنها لەكۆمەڵگای (شاری) 18 حالەتی زەواج هەبووە و
بەهۆی دەستنەكەوتنی هۆڵەكانی بوك گواستنەوە لەئێواراندا، ئێستا لەبەیانیانیش شایی و
هەڵپەڕكێ بەڕێوە دەچێت.
ئەیاد حەجاج، كە دانیشتووی كۆمەڵگای
(خەتارێ)یە، دەڵێت "جاران لەماوەی مانگێك ئەگەر یەك داوەت هەبووایە، بەڵام لەدوای
بڕیارەكەی ئەنجوومەنی رووحانی ئێزیدی بەكەمكردنەوەی نەختی زێڕ بۆ 75 غرام، ئێستا
هۆڵەكانی بوك گواستنەوە لەئێواراندا دەستناكەوێت و خەڵكێكی زۆر لەبەیانیاندا شایی و
هەڵپەركێ لەهۆڵەكاندا دەكەن".
تازە زاوایەك كە ماوەی چەند
رۆژێكە چۆتە نێو پرۆسەی هاوسەرگیری، ئاماژە بەوە دەكات، كە ئەگەر ئەو بڕیارەی
ئەنجوومەمەنی رووحانی نەبووایە، ئەو بەهیچ شێوەیەك نەیدەتوانی ژیانی هاوسەری
پێكبهێنێت، بەڵام لەئێستادا ئەوان تەنها دوو ملیۆن دیناریان وەكو نەخت داوە بەماڵی
كچە و توانیویانە هەموو ئیشوكارەكانیان رایی بكەن. (عیدۆ مشكۆ) كە تەمەنی 27 ساڵە و
دانیشتووی كۆمەڵگەی (شاریا)یە، گوتیشی "خەڵكی ئێمە هەمووی دەسكورتن و بەو بڕیارە،
هەم كچان لەقەیرەبوون رزگاریان دەبێت و هەم كوڕانیش چیدی بیر لەچوونە دەرەوەی وڵات
ناكەنەوە".
نارین عەلی، ئەویش وەكو كچێكی ئێزیدی خۆشحاڵی
خۆی سەبارەت بەو بڕیارەی ئەنجوومەنی رووحانی ئێزیدی دەربڕی و راشكاوانەش ئاماژەی
بەوەكرد، كە لەدوای ساڵی 2003 و گۆڕانكارییەكانی بەسەر ناوچەكەدا هاتووە، كچانی
ناوچەكەی تووشی بێئومێدیەكی زۆر كردبوو، بەهۆی شوونەكردنیان و نزیكبوونەوەیان
لەقەیرەیی، ئەو كچە دەڵێت "ئێمە وەكو كچ لەدوای شەڕی رزگاری عێراق، بێئومێد ببووین
لەشووكردن، چونكە بارەكە لەسەر كوڕان قورس كەوتبوو و زۆربەی گەنجانمان چوونە
دەرەوەی وڵات و لەوێ ژیانی هاوسەریان بەیەكەوەنا، بەڵام ئەو بڕیارەی ئەنجوومەنی
رووحانی بەر لەوەی دەرفەتی باش بۆ كوڕەكان دەستەبەر بكات تا ژیانی هاوسەری بەیەكەوە
بنێن، بۆ ئێمەی كچان دووجار مایەی خۆشحاڵییە، چونكە ئەوانەشی كە چەندین ساڵە
مابوونەوە و قەیرەببوون، ئێستا شانسی زەواجیان بۆ گەڕاوەتەوە".
خەیری بوزانی، بەڕێوەبەری گشتی كاروباری ئێزیدیان لەوەزارەتی
ئەوقاف و كاروباری ئاینی حكومەتی هەرێمی كوردستان، ئەویش لەلای خۆیەوە ئاماژەی
پێكرد، كە دوای دەرچوونی بڕیارەكەی ئەنجوومەنی رووحانی ئێزیدی، كە نابێت خانەوادەی
هیچ كچێك لەكاتی مارەكردندا، بۆ وەرگرتنی نەختی كچەكەیان لە75 غرام زێڕی عەیار 21
زیاتر وەربگرن، رێژەی زەواجی لەناوچەكەی ئەواندا بەرز كردۆتەوە. گوتیشی "ئەو بڕیارە
كاریگەریەكی زۆریشی هەبووە، لەسەر كەمكردنەوەی دیاردەی چوونە دەرەوەی وڵات و
قەیرەبوونی كچان، ئەمە سەرەڕای كەمتر بوونەوەی ئەو كێشە كۆمەڵایەتیانەی كە پێشووتر
هەبوون و لەوەش گرنگتر، پاپەندبوونی خەڵك بەبڕیارەكە"، كە وەكو ئەویش دەڵێت
"تائێستا لەهیچ شوێنێكی ئێزیدیاتی پێشێلی لەبڕیارەكە نەكراوە".
ئەو بەڕێوەبەر گشتییەی ئێزیدیان لەوەزارەتی ئەوقاف، ئەوەشی گوت
كە "ئەنجوومەنی رووحانی ئێزیدی بڕیاریشی داوە كە هەموو ساڵێك چوار كۆبوونەوە لەسەر
كێشە كۆمەڵایەتییەكانی ناوچەكە و چارەسەركردنیان، ئەنجام بدات".
| توقيــع العضو شميران كركوكي |
|
الخميس 10 ديسمبر 2015, 4:36 pm من طرف hayderaltimimi
