نەونەمامی زراڤی نێو بیرەوەریم
لەنێو تەنهایمدا بڕوێ
بەڵكو تەرزی خۆزگەكانم
بە بەژنتدا بـئاڵێنم و
تەرزی عیشقم
لە قامەتی شاتووی نامۆیی بپسێنم
لە نێو خەیاڵمدا بڕوێ
ئەندێشەم تەژی دە بێ
بەو وێنە شیعرە جوانانەی
خۆیان دەكەن بە شادێڕ و
گوڵی سووری ئێوارەكانیان
لە بەرۆكی سپێدەیەكی خەواڵو ئەدەن
لە نێو خەونەكانم بڕوێ
سەدەیەك بە كپی دەنووم و
هێشتا ترسی وەئاگا هاتنەوەم
لێدەنیشی
لە تێڕوانینمدا خۆت بكە بە شەقام
با بە درێژی ڕێگاكانتا گەشتێك سازكەم
بێكۆتایی
كە ماسییەكان لە جەنگی شەپۆل و
دەریا وەڕس دە بن
تاسەیەكیان بۆ مروارییەكان نامێنی و
دەخزێنە تۆڕی ماسیگرێكەوە
لە چاوەڕوانیدا بێهودەیە
ئیدی لەم زیندانە گەورەیەی
ئەم ژیانە ئازادەدا
چ ڕێگایەك بگرمە بەر
كە ناخم كۆیلەی عیشقە و
بیرم ئایدیا
لەگەڵ بالیای خەمەكانم
بە چ ڕیتمێـك
پەپولەكانی دەرونم بێنمە سەما
چنار نامق خاوةنى هونراوة..........