چیرۆكی ئەو هاوسەرانەی كە بەر لەپێكهێنانی ژیانی
هاوسەرگیری، سێكسیان لەگەڵ یەكدا كردووە و پاشتر رووبەڕووی كێشە بوونەتەوە
سڤیل: محەمەد قادر
ئەو كوڕ و كچانەی بەر لەگواستنەوەی
هاوسەرەكانیان، كاری سێكسیان لەگەڵ دەسگیرانەكانیان ئەنجامداوە، سەرئەنجام دووچاری
كێشە و گرفت بوونەتەوە و كەوتونەتە بەر تانە و قسەی خەڵك، توێژەرێكی كۆمەڵایەتیش
ئاماژە بەوە دەكات كە "زۆرجار ماڵی كچەكە داوای زۆر شت لەكوڕەكە دەكەن و ئەمەش
وادەكات كە كوڕەكە نەتوانێت بەخێرایی كچەكە بگوازێتەوە و سەرئەنجام سێكسی بەر
لەپرۆسەی هاوسەرگیری، كێشەی كۆمەڵایەتی بۆ كچە و كوڕە لێ دەكەوێتەوە".
ئاسۆ نەجم، ناوی خوازراوی كوڕە گەنجێكی تەمەن 26 ساڵەی
دانیشتووی دەڤەری سۆرانە، كە لەو ماوەیەدا ژیانی هاوسەری پێكهێناوە، وەك خۆی دەڵێت
"من و هاوسەرەكەم نازانین پەنا بۆ كوێ بەرین، لەبەر خزم و دراوسێكانمان، چونكە
بەردەوام زمانیان بڕیوەتە ئێمە، هۆكارەكەشی ئەوەیە، كە كاتێ ژنەكەم گواستەوە سكی
هەبوو، بەهۆی ئەوەی من لەكاتی دەسگیرانی چوومە لای و پەردەی كچێنی نەما"، وەكو ئاسۆ
ئاماژەی بۆ دەكات و دەڵێت "سەرئەنجام دەسگیرانەكەم هەر لەماڵی باوكییەوە دووگیان
بوو، هەرچەندە پەلەم كرد لەگواستنەوەی، بەڵام بەهۆی كەمدەرامەتیم چەند مانگێك
پڕۆسەی هاوسەرگیریەكەم دواكەوت، ئەمەش بۆ ئێمە شتێكی ناخۆش بوو"، ئاسۆ ئەوەشی گوت
كە "هەرچەندە لەو كاتەی ئەو كارەم ئەنجامدا، دوای مارە بڕینەكەمان بوو،
دەستگیرانەكەم حەڵاڵی خۆم بوو، كەچی لەكۆمەڵگەی ئێمەدا زۆربەی شتەكان بەعەیب
دادەنرێن، بۆیە دەبوایە بیرم لەوە بكردبایەوە، كە ئەو كارە ئەنجام نەدەم، كە ئەوەی
زیاتر خەتاباریش بوو، من بووم، چونكە هەر لەسەرەتاوە دەستگیرانەكەم زۆر پێداگری كرد
و داوای كرد كە تادوای ئاهەنگی بوك گواستنەوەمان، ئەو كارە نەكەین، كەچی من پێمگوت
ئەمەیان كێشە نییە، چونكە تۆ حەڵاڵی منی و تازە مافی هیچ كەسێك بەسەرتەوە نییە".
سەنگەر عەلی، ناوی خوازراوی پیاوێكی تەمەن 38 ساڵەیە و ئەویش
دووچاری هەمان گرفت ببۆوە، ئەو گوتی "زۆر شت بەبێ ویستی مرۆڤ بەدی دێـت و
لەكۆتاییشدا دەبێتە هۆی نیگەرانی كەسەكە، چونكە ئەوەی روویدا، من هەرگیز پێشبینیم
نەدەكرد، كە كۆتايیەكی تاڵ دەبێت و گرفتم بۆ دروستدەكات"، ئەو هاتە سەرباسی
بەسەرهاتەكەی و گوتیشی "من لەتەمەنی لاویمدا بەهۆی ئەنجامدانی كاری سێكسی لەگەڵ
دەزگیرانەكەم، واتە دوای مارەبڕینی، هەم دەسگیرانەكەم لەدەستدا و هەمیش دەفتەرێك
دۆلاریان لێ ستاندم، لەگەڵ ئەوەشدا ئەوەندەیان ترساندم، ناوێرم هەر ناویشیان
بهێنم".
ئەو پیاوە زیاتر ئاخاوت و روونی كردەوە كە "ئەو
كچەی كە لەسەرەتاوە خۆشمویست چەندینجار خوازبێنیم كرد، تاوەكو ماڵی بابی رازی بوون،
بەڵام خۆزگە هەر رازی نەدەبوون و منیش تووشی ئەو ماڵوێرانییە نەدەبووم، بەهۆی ئەو
رووداوە ناخۆشانەی كە دوای مارەبڕینەكە رووبەڕوومان بوونەوە، چونكە ئەوان گوتیان
بەو مەرجە كچەكە دەدەینە كوڕەكەتان، دەبێت تاوەكو ساڵێك نەیگوازێتەوە"، بۆیە وەكو
سەنگەر دەڵێت "منیش لەو ماوە دوورودرێژەدا دووچاری هەڵە بوومەوە، ئەویش ئەنجامدانی
كاری سێكسیم بوو، لەگەڵ كچەكە لەماڵی باوكیدا كە دوایی چەند مانگێك دەسگیرانەكەم
دووگیان بوو، واتە لەسكییەوە دیاربوو كە ئافرەتەكە دووگیانە، ئەوانیش كەسوكاری
خۆیان كۆكردەوە سەبارەت بەرووداوەكە و هەندێكیان گوتبوویان دەبێت كچەكە و كوڕەكە
بكوژرێن، بەڵام لەكۆتاییدا گەیشتنە ئەو بڕیارەی كە دەستگیرانەكەم ببەن بۆ ماڵی
خزمێكیان تاوەكو منداڵەكەی لەبار بچووێنن، ئەوكات قسەی لەسەربكەن، دوای ئەوەی كە
ئەو ئافرەتە منداڵەكەی لێ جیاكرایەوە، وەكو گوتیان، منداڵەكەمان لەناو سكی دایكی
مردبوو، ئینجا بەدوای من و كەسوكارەكەمیان نارد، كە ئەو ئافرەتە تەڵاق بدەین و دوو
دەفتەر دۆلاریش سزاكەی بدەین، هەرچەند كردمان كە ئەو ئافرەتە تەڵاق نەدەین، بەڵام
بێهودە بوو"، سەنگەر دەڵێت "لەكۆتاییدا بەناچاری دەستگیرانەكەم تەڵاق داو بڕی
پارەكەشیان كەم كردەوە بۆ یەك دەفتەر دۆلار، بۆیە دوای ئەو رووداوە، بڕیارم داوە
هەرگیز جارێكی دیكە بیر لەپێكهێنانی ژیانی هاوسەری نەكەمەوە".
ئاكار عومەر، ناوی خوازراوی كوڕە گەنجێكی باڵا مام ناوەندی
چاوكاڵی تەمەن 31 ساڵەی دانیشتووی شاری سۆرانە، ئەویش لەدوای ئەوەی بەهۆی ژن بەژنە،
واتە گەورە بەگچكە، كچێكی لێ مارە دەكرێت، وەك خۆی ئاماژەی پێ دەدات، بەر لەوەی
دەسگیرانەكەی بگوازێتەوە، چەندینجار لەگەڵی جووت بووە، ئەو گەنجە هێمای بۆ
ئەوەشكرد، كە نەیتوانیوە خۆی رابگرێت لەبەردەم سۆز و عاتیفەی خۆشەویستەكەی، بۆیە
دوای چەندینجار بەیەكەوە چوونە دەرەوە، ئەم حالەتە دروستبووە، هۆكارەكەشی گەڕاندەوە
بۆ تەمەنی هەرزەكاری نێوان خۆی و ئەو كچە، گوتیشی "هەرچەندە ئەنجامدانی كاری سێكسیم
لەگەڵی، نەبووە هۆی دووگیانبوونی دەسگیرانەكەم، بەڵام پێیانگوتم دەبێت دەسگیرانەكەت
تەڵاق بدەی، ئەوە لەكاتێكدابوو كە كچەكە پەردەی كچێنی لەدەستدابوو، بێ ئەوەی
نەخێزانەكەی من و نەخێزانی ئەویش بیزانن".
ئاكار ئەوەشی گوت
كە هۆكاری لێك دوورخستنەوەیان "دروستبوونی كێشەیەكی كۆمەڵایەتی بوو لەنیوان خوشكم و
زاواكەمان دا، بۆیە ئەوان گوتیان، كە چۆن خوشكەكەی من لەلای پیاوەكەی دانەنیشتووە و
تەڵاقدراوە، نابێت منیش دەسگیرانەكەم بگوازمەوە، بەڵكو دەبێت تەڵاقی بدەم، بۆیە
خەریكبوو لەو ناوە من و دەسگیرانەكەم شێت ببین، تاوای لێهات شەوێك لەشەوان
دەسگیرانەكەم هەڵگرت و پێكەوە چووینە لای بەرپرسێك و بەهەزار حاڵ تا ماڵی باوكی
دەسگیرانەكەمیان رازی كرد، كە وازمان لێ بێنن و بمانبوورن، بەڵام چ لێبوردنێك؟ تاكو
ئێستا نەمن و نەخێزانەكەم نەمانوێراوە بچینە لای ماڵی خەزورم، ئەو هەموو كێشە و
دەردەسەریەش تەنها بەهۆی ئەو كردارەبوو، كە لەگەڵ دەسگیرانەكەم بەر لەگواستنەوەی
ئەنجامم دابوو".
سەربەست سەلیم، توێژەرێكی كۆمەڵایەتییە و
خەڵكی ناوچەكەشە، ئەویش سەبارەت بەو كێشە كۆمەڵایەتییە بۆ (سڤیل) دوا و گوتی
"دواخستنی پڕۆسەی هاوسەرگیری، واتە بۆ ئەو كەسانەی كاتێ كچێك مارە دەكەن و بۆ
ماوەیەكی دوورودرێژ نایگوازنەوە، بەوپێیەی كە لەو ماوەیە كچ و كوڕەكە لەكاتی
وێنەگرتن و كڕینی شتومەك و مۆدیلاتی تازە، چەند جارێك بەیەكەوە دەچنە دەرەوە و هیچ
شەرمێكیان لەبەرامبەر یەكتری نامێنێت، ئەوەش دەبێتە هۆكارێك كە بەبێ بیركردنەوە و
لەبەرچاوگرتنی پاشەڕۆژیان، هەندێ لەكوڕ و كچەكان لەدەرئەنجامی دەستبازی و سۆز و
خۆشەویستییەوە، كاری سێكسی لەگەڵ دەسگیرانەكەیان ئەنجام بدەن، لێرەوەش زۆرجار ماڵی
كچەش تاوانبار دەبن، چونكە لەكاتی رازیبوونیان كە كچەكەیان بدەن بەكوڕەكە، داوای
ماڵ و زێڕێكی زۆری لێدەكەن، كە ماڵی كوڕەكە نەتوانن بەماوەیەكی زوو ئەو بڕە پارەیە
كۆبكەنەوە و بوكەكەیان بگوازنەوە"، وەك ئەو توێژەرە كۆمەڵایەتییە دەڵێت "كەسی وا
دەناسم نزیكەی ساڵێك دەبێت ژنی مارەكردووە، بەڵام بەهۆی داواكردنی ماڵ و زێڕێكی زۆر
لەلایەن ماڵی كچەكەوە، تائێستا توانای گواستنەوەی نییە". ئەو توێژەرە ئەوەشی گوت كە
"ئەگەر كوڕ و كچێك بەدڵ یەكتریان بووێت، پێویست ناكات ماڵ و زێڕ بكرێت بەپاساوێك كە
بەهۆیە تووشی كێشە و گرفت ببنەوە، هەروەها ئەوانەی كە كچێك لەكوڕەكەیان مارە دەكەن
با پەلەبكەن لەگواستنەوەی، چونكە لەو دواكەوتنەدا زۆرجار چەندین كێشە و گرفت دروست
دەبێت، لەهەمانكاتیشدا پێویستە كوڕ و كچەكە ئەوە لەبەرچاو بگرن و خۆیان لەو جۆرە
كارانە بپارێزن".
| توقيــع العضو شميران كركوكي |
|
الخميس 10 ديسمبر 2015, 4:36 pm من طرف hayderaltimimi
